لاہور: قانون نافذ کرنے والے اداروں نے تحریک لبیک پاکستان (ٹی ایل پی) کے سربراہ سعد حسین رضوی کی رہائش گاہ پر خفیہ اطلاع کی بنیاد پر چھاپہ مار کارروائی کی جس کے دوران بھاری مقدار میں نقدی، غیر ملکی کرنسی اور قیمتی زیورات برآمد کیے گئے ہیں۔
ذرائع کے مطابق، کارروائی رات گئے لاہور کے علاقے اقبال ٹاؤن میں کی گئی جہاں سے کروڑوں روپے مالیت کی پاکستانی اور غیر ملکی کرنسی، سونا، چاندی کے زیورات، قیمتی گھڑیاں اور دیگر اشیاء برآمد ہوئیں۔ بتایا جا رہا ہے کہ چھاپے کے دوران گھر میں موجود افراد سے پوچھ گچھ بھی کی گئی اور کئی اہم دستاویزات قبضے میں لی گئیں۔
قانون نافذ کرنے والے اداروں کے مطابق، چھاپے کا مقصد غیر قانونی فنڈنگ اور بیرون ملک سے آنے والی رقوم کے ذرائع کا پتہ لگانا تھا۔ ابتدائی تحقیقات میں انکشاف ہوا ہے کہ فنڈز مختلف بینک اکاؤنٹس کے ذریعے پاکستان منتقل کیے جا رہے تھے، جن کی تفصیلات ایف آئی اے کو فراہم کر دی گئی ہیں۔
ادھر تحریک لبیک پاکستان کے ترجمان نے چھاپے کی مذمت کرتے ہوئے کہا ہے کہ یہ سیاسی انتقام کی کارروائی ہے۔ پارٹی کے مطابق، رہنماؤں اور کارکنوں کے خلاف بلاجواز کارروائیاں برداشت نہیں کی جائیں گی اور جلد قانونی چارہ جوئی کی جائے گی۔
ذرائع کا کہنا ہے کہ برآمد شدہ رقم اور زیورات کو تحویل میں لے کر مزید تحقیقات کے لیے خصوصی ٹیم تشکیل دے دی گئی ہے۔
