ممبئی: بھارتی کرکٹ ٹیم کے اسٹار بلےباز سوریا کمار یادو نے شریاس ایئر کی صحت کے حوالے سے خوشخبری سناتے ہوئے کہا ہے کہ وہ اب کافی بہتر ہیں اور ڈاکٹروں کی زیرِ نگرانی علاج جاری ہے۔ ان کے مطابق شریاس ایئر مکمل صحتیابی کی جانب گامزن ہیں اور اپنے چاہنے والوں کو پیغامات کے ذریعے جواب بھی دے رہے ہیں۔
سوریا کمار یادو نے میڈیا سے گفتگو میں کہا کہ شریاس ایئر کے ساتھ ڈاکٹر موجود ہیں، وہ مسلسل فٹنس سیشنز کر رہے ہیں اور سب کو رپلائی بھی کر رہے ہیں۔ انہوں نے کہا کہ ٹیم کے تمام کھلاڑی ان کی جلد واپسی کے منتظر ہیں اور ٹیم میں ان کی کمی شدت سے محسوس کی جا رہی ہے۔
یاد رہے کہ شریاس ایئر حال ہی میں کمر کی تکلیف کے باعث ٹیم سے باہر ہیں اور انہیں بحالی کے لیے آرام کا مشورہ دیا گیا تھا۔ بی سی سی آئی کے مطابق ان کی حالت پہلے سے کافی بہتر ہے، تاہم میڈیکل ٹیم انہیں مکمل فٹنس حاصل کرنے کے بعد ہی ٹیم میں شامل کرے گی۔
سوریا کمار یادو نے کہا کہ شریاس ایئر ایک فائٹر کھلاڑی ہیں، اور ان کی واپسی سے ٹیم کے مڈل آرڈر کو مزید مضبوطی ملے گی۔ انہوں نے شائقین سے بھی درخواست کی کہ وہ شریاس کی صحتیابی کے لیے دعائیں جاری رکھیں۔
