کراچی: اسٹیٹ بینک آف پاکستان نے مانیٹری پالیسی کے نئے جائزے میں شرحِ سود 11 فیصد کی سطح پر برقرار رکھنے کا اعلان کر دیا ہے۔ مرکزی بینک کے مطابق ملکی معیشت میں استحکام اور مہنگائی کے دباؤ میں کمی کے باوجود شرحِ سود میں فی الحال کوئی تبدیلی نہیں کی جا رہی۔
اسٹیٹ بینک کے اعلامیے میں کہا گیا ہے کہ حالیہ مہینوں میں افراطِ زر میں بتدریج کمی آئی ہے، تاہم بیرونی مالیاتی دباؤ، عالمی منڈی میں تیل کی قیمتوں اور روپے کی قدر میں ممکنہ اتار چڑھاؤ کو مدنظر رکھتے ہوئے محتاط پالیسی برقرار رکھنا ضروری ہے۔
مرکزی بینک نے مزید کہا کہ موجودہ پالیسی شرح معیشت میں بتدریج بحالی، نجی شعبے کی سرمایہ کاری کے فروغ اور مالیاتی نظم و ضبط کے تسلسل میں مددگار ثابت ہوگی۔ اس کے ساتھ ساتھ زرمبادلہ کے ذخائر میں بہتری اور کرنٹ اکاؤنٹ خسارے میں کمی کے مثبت اثرات بھی سامنے آ رہے ہیں۔
اقتصادی ماہرین کے مطابق شرحِ سود کو برقرار رکھنے کا فیصلہ متوازن ہے، کیونکہ ایک جانب حکومت کو قرض کے بوجھ میں کمی کی ضرورت ہے، جبکہ دوسری جانب افراطِ زر پر قابو پانے کے لیے محتاط مالیاتی رویہ اختیار کرنا ناگزیر ہے۔
اسٹیٹ بینک نے عندیہ دیا ہے کہ اگر مہنگائی کا رجحان مزید نیچے گیا تو آئندہ اجلاس میں شرحِ سود میں کمی پر غور کیا جا سکتا ہے۔
