لاہور: پنجاب آرٹس کونسل نے اسٹیج ڈرامہ میں فحش حرکات اور غیر اخلاقی پرفارمنس پر سخت کارروائی کرتے ہوئے متعلقہ اداکاروں اور تھیٹر ہولڈر کو نوٹس جاری کر دیا ہے۔ واقعہ لاہور کے ایک معروف تھیٹر میں پیش آیا جہاں دورانِ اسٹیج ڈرامہ فحش مکالموں اور ڈانس پرفارمنس پر عوامی شکایات موصول ہوئیں۔
ترجمان پنجاب آرٹس کونسل کے مطابق شکایات موصول ہونے پر ٹیم نے فوری ایکشن لیتے ہوئے ڈرامے کی ویڈیو ریکارڈنگ حاصل کی، جس میں ضابطہ اخلاق کی صریح خلاف ورزی پائی گئی۔ اس کے بعد تھیٹر منیجر، ہدایت کار اور اداکاروں کو وضاحتی نوٹس جاری کرتے ہوئے تین دن میں جواب طلب کیا گیا ہے۔
حکام کا کہنا ہے کہ اگر وضاحت غیر تسلی بخش ثابت ہوئی تو متعلقہ تھیٹر کی لائسنس منسوخی اور آئندہ اسٹیج ڈراموں پر پابندی سمیت سخت کارروائی عمل میں لائی جائے گی۔
محکمہ اطلاعات و ثقافت پنجاب نے واضح کیا ہے کہ اسٹیج تھیٹر عوامی تفریح کا ذریعہ ہے، اسے فحاشی یا غیر اخلاقی مواد کے فروغ کے لیے استعمال نہیں ہونے دیا جائے گا۔ اس سلسلے میں تمام تھیٹرز کو ہدایت کی گئی ہے کہ اسٹیج اسکرپٹ کی پیشگی منظوری لازمی حاصل کریں۔
شہریوں نے حکومت کے اس اقدام کو سراہتے ہوئے کہا کہ تھیٹرز میں خاندانی تفریح کا ماحول برقرار رکھنا ضروری ہے تاکہ ہر عمر کے افراد بلا جھجک تفریحی پروگرام دیکھ سکیں۔
