اسلام آباد: وفاقی تحقیقاتی ایجنسی (ایف آئی اے) نے پاکستان تحریکِ انصاف (پی ٹی آئی) کی رہنما شاندانہ گلزار کے خلاف ریاست مخالف مواد پھیلانے کے الزام میں مقدمہ درج کر لیا ہے۔ ایف آئی اے کے مطابق، شاندانہ گلزار پر سوشل میڈیا کے ذریعے ریاستی اداروں، عدلیہ اور حکومتی شخصیات کے خلاف نفرت انگیز اور اشتعال انگیز مواد پھیلانے کا الزام عائد کیا گیا ہے۔
ذرائع کے مطابق ایف آئی اے سائبر کرائم ونگ نے شاندانہ گلزار کے سوشل میڈیا اکاؤنٹس سے حاصل کردہ مواد کی بنیاد پر مقدمہ درج کیا۔ ایف آئی اے کا کہنا ہے کہ تحقیقات کے دوران ریاست مخالف پروپیگنڈا کے ثبوت سامنے آئے ہیں، جس پر مزید تفتیش جاری ہے۔
پی ٹی آئی ترجمان نے اس اقدام کو سیاسی انتقام قرار دیتے ہوئے کہا کہ حکومت مخالف آوازوں کو دبانے کے لیے ایف آئی اے کا استعمال کیا جا رہا ہے۔ پارٹی نے مطالبہ کیا ہے کہ مقدمہ فوری طور پر واپس لیا جائے اور اظہارِ رائے کی آزادی کا احترام کیا جائے۔
