لاہور: پنجاب حکومت نے صوبے بھر کے تمام ٹول پلازوں پر جدید نظام متعارف کرانے کا فیصلہ کر لیا ہے، جس کے تحت روایتی پرچیوں کا سلسلہ ختم کر کے نظام کو مکمل طور پر ڈیجیٹلائز کیا جائے گا۔ اس فیصلے کا مقصد شفافیت میں اضافہ، آمدن کے درست اندراج اور کرپشن کے امکانات کا خاتمہ ہے۔
ذرائع کے مطابق محکمہ مواصلات و تعمیرات پنجاب نے اس منصوبے کے لیے نجی کمپنیوں سے تجاویز طلب کر لی ہیں، جبکہ ابتدائی مرحلے میں لاہور، راولپنڈی، فیصل آباد، ملتان اور بہاولپور کے مرکزی راستوں پر ٹول پلازے جدید الیکٹرانک سسٹم سے منسلک کیے جائیں گے۔ تمام گاڑیوں کے لیے RFID (ریڈیو فریکوئنسی آئیڈینٹی فکیشن) اور ایزی پاس جیسے خودکار نظام متعارف کرائے جائیں گے، جن سے بغیر رکے ٹول ٹیکس کی ادائیگی ممکن ہوگی۔
محکمہ کے ترجمان کے مطابق، اس فیصلے سے ٹریفک کے بہاؤ میں بہتری، وقت کی بچت اور مالی شفافیت یقینی بنائی جائے گی۔ تمام ٹول پلازوں کے کیمروں کو نادرا اور ٹریفک پولیس کے ڈیٹا بیس سے بھی منسلک کیا جائے گا، جس سے گاڑیوں کی مانیٹرنگ اور سیکیورٹی نظام میں بہتری آئے گی۔
ذرائع کا کہنا ہے کہ ڈیجیٹل ٹول سسٹم کے نفاذ کے بعد ٹول پلازوں پر انسانی عملے کی ضرورت کم ہو جائے گی، جبکہ شہریوں کو موبائل ایپ کے ذریعے ٹول ادائیگی، رسید، اور سفر کی تفصیل دستیاب ہوگی۔
ماہرین کے مطابق یہ قدم نہ صرف پنجاب میں ٹریفک مینجمنٹ کے لیے ایک سنگ میل ثابت ہوگا بلکہ اس سے سرکاری محصولات میں بھی نمایاں اضافہ متوقع ہے۔
