لاہور: حساس اداروں کی رپورٹس کے بعد پنجاب بھر میں سکیورٹی ہائی الرٹ کر دی گئی ہے۔ ممکنہ دہشتگردی کے خطرات کے پیش نظر تمام اضلاع میں پولیس اور قانون نافذ کرنے والے اداروں کو چوکنا رہنے کی ہدایت جاری کر دی گئی ہے۔
ذرائع کے مطابق سکیورٹی اداروں نے اطلاع دی ہے کہ دہشتگرد تنظیمیں اہم سرکاری عمارات، عوامی مقامات اور مذہبی اجتماعات کو نشانہ بنانے کی منصوبہ بندی کر سکتی ہیں۔ اس تناظر میں لاہور، راولپنڈی، فیصل آباد، ملتان، گوجرانوالہ اور دیگر بڑے شہروں میں چیکنگ پوائنٹس کی تعداد بڑھا دی گئی ہے۔
پولیس حکام کے مطابق داخلی و خارجی راستوں پر سخت نگرانی کی جا رہی ہے، جبکہ ہوٹلوں، گیسٹ ہاؤسز اور کرایہ کے گھروں کی جانچ بھی تیز کر دی گئی ہے۔ مشکوک افراد کی نشاندہی کیلئے شہریوں سے بھی تعاون کی اپیل کی گئی ہے۔
انسپکٹر جنرل پنجاب ڈاکٹر عثمان انور نے ہدایت کی ہے کہ تمام فیلڈ افسران گشت میں اضافہ کریں اور ہنگامی صورتِ حال سے نمٹنے کیلئے فوری ردعمل یقینی بنائیں۔ بم ڈسپوزل اسکواڈز، ایلیٹ فورس اور اسپیشل برانچ کے عملے کو بھی ہائی الرٹ رکھا گیا ہے۔
سکیورٹی ذرائع کا کہنا ہے کہ الرٹ کی مدت حساس اطلاعات کی نوعیت کے مطابق برقرار رکھی جائے گی اور کسی بھی ممکنہ خطرے سے نمٹنے کیلئے مربوط حکمت عملی تیار کر لی گئی ہے۔
