لاہور: پنجاب حکومت نے صوبے بھر میں ٹریفک قوانین کی خلاف ورزیوں پر سخت کارروائی کا فیصلہ کرتے ہوئے بھاری جرمانے نافذ کر دیے ہیں۔ محکمہ ٹرانسپورٹ کے مطابق یہ فیصلہ صوبے میں بڑھتے ہوئے حادثات، لاپرواہی سے ڈرائیونگ اور شہریوں کی جان و مال کے تحفظ کو مدنظر رکھتے ہوئے کیا گیا ہے۔
نئے قوانین کے تحت ون وے کی خلاف ورزی، اوور اسپیڈنگ، بغیر ہیلمٹ موٹر سائیکل چلانے، غیرقانونی پارکنگ، اور سگنل توڑنے پر بھاری جرمانے عائد کیے جائیں گے۔ محکمہ نے واضح کیا ہے کہ اب خلاف ورزی پر معمولی چالان نہیں بلکہ الیکٹرانک مانیٹرنگ کے ذریعے خودکار جرمانے عائد ہوں گے جن کی اطلاع موبائل فون کے ذریعے موصول ہوگی۔
محکمہ ٹرانسپورٹ پنجاب کے مطابق شہریوں کو قانون پر عمل کرنے کی تاکید کی گئی ہے، بصورت دیگر ڈرائیونگ لائسنس معطل کرنے یا گاڑی ضبط کرنے جیسے اقدامات بھی کیے جا سکتے ہیں۔
ذرائع کے مطابق پنجاب سیف سٹیز اتھارٹی نے لاہور سمیت بڑے شہروں میں جدید ڈیجیٹل ٹریفک مانیٹرنگ سسٹم فعال کر دیا ہے جو گاڑیوں کی نمبر پلیٹس کی شناخت کے ذریعے خودکار چالان جاری کرے گا۔
حکام نے عوام سے اپیل کی ہے کہ وہ ٹریفک قوانین کی پاسداری کریں تاکہ حادثات میں کمی لائی جا سکے اور شہروں میں ٹریفک کا نظام بہتر بنایا جا سکے۔
