لاہور نیوز کی رپورٹ کے مطابق قومی اسمبلی کے اجلاس کے دوران حکومتی طرز عمل پر پیپلز پارٹی نے واک آؤٹ کر کے احتجاج کیا اور پارلیمانی پارٹی کا ہنگامی اجلاس طلب کر لیا۔ پیپلز پارٹی کے رہنما نوید قمر کا موقف تھا کہ حکومت نے ایک ایسا آرڈیننس نافذ کیا ہے جس کی صدر پاکستان نے توثیق نہیں کی، اس لیے اس کی کوئی قانونی حیثیت نہیں ہے۔ انہوں نے کہا کہ قانون سازی ایوان کی بنیادی ذمہ داری ہے اور ایسے غیر آئینی عمل کا حصہ بننا ان کے لیے ممکن نہیں۔ اس موقع پر وزیر قانون اعظم نذیر تارڑ نے حکومتی موقف بیان کرتے ہوئے کہا کہ انہیں سوشل میڈیا پر اٹھائے گئے سوالات کی اطلاع ہے اور ان کا مؤقف ہے کہ جب تک صدر توثیق نہ کریں، حکومت اسے نوٹیفائی نہیں کرتی۔ چیئرمین پیپلز پارٹی بلاول بھٹو زرداری نے اس معاملے پر غور کے لیے اپنی پارلیمانی جماعت کا اجلاس دوپہر دو بجے پارلیمنٹ ہاؤس میں طلب کر لیا ہے، جس میں آئینی عمل میں حکومت کے طریقہ کار پر تحفظات پر تبادلہ خیال ہوگا۔
ماخذ: لاہور نیوز
