لزبن: برطانیہ، کینیڈا اور آسٹریلیا کے بعد اب پرتگال نے بھی فلسطین کو ایک آزاد اور خودمختار ریاست کے طور پر تسلیم کرنے کا باضابطہ اعلان کر دیا ہے۔ پرتگالی وزارتِ خارجہ کی جانب سے جاری بیان میں کہا گیا ہے کہ یہ فیصلہ مشرقِ وسطیٰ میں دیرپا امن اور دو ریاستی حل کی حمایت کے عزم کا مظہر ہے۔
بیان میں مزید کہا گیا ہے کہ فلسطین کو آزاد ریاست تسلیم کرنا عالمی برادری پر واضح کرتا ہے کہ انسانی حقوق اور خود ارادیت کے اصولوں پر کوئی سمجھوتہ نہیں کیا جا سکتا۔ پرتگال نے اقوام متحدہ اور یورپی یونین پر زور دیا ہے کہ وہ بھی اس اقدام کی حمایت کریں اور فلسطینی عوام کے حقِ خودارادیت کے لیے مؤثر اقدامات اٹھائیں۔
یاد رہے کہ حالیہ مہینوں میں فلسطین کی ریاستی حیثیت کے حوالے سے دنیا بھر میں مثبت پیش رفت دیکھنے کو ملی ہے اور کئی مغربی ممالک ایک کے بعد ایک اس کو تسلیم کر رہے ہیں، جس سے اسرائیل پر سفارتی دباؤ بڑھ رہا ہے۔
حوالہ: الجزیرہ، الجزیرہ انگلش، رائٹرز، بی بی سی ورلڈ نیوز رپورٹس۔
