اسلام آباد: وزیراعظم پاکستان شہباز شریف نے بابا گرونانک دیو جی کے 556 ویں یومِ ولادت کے موقع پر سکھ برادری کو مبارکباد دیتے ہوئے کہا ہے کہ پاکستان میں سکھ برادری کو مکمل مذہبی آزادی حاصل ہے اور حکومت تمام اقلیتوں کے حقوق کے تحفظ کے لیے پرعزم ہے۔

وزیراعظم نے اپنے پیغام میں کہا کہ بابا گرونانک کی تعلیمات امن، محبت، رواداری اور انسانیت کے احترام کا درس دیتی ہیں۔ ان کی تعلیمات آج بھی دنیا کے لیے مشعلِ راہ ہیں۔ انہوں نے کہا کہ پاکستان میں بسنے والی سکھ برادری قومی ترقی میں فعال کردار ادا کر رہی ہے جس پر پوری قوم کو فخر ہے۔

شہباز شریف نے مزید کہا کہ حکومت سکھ یاتریوں کے لیے کرتارپور راہداری سمیت تمام مذہبی مقامات پر سہولیات کی فراہمی یقینی بنا رہی ہے تاکہ وہ اپنے مذہبی فرائض آزادی اور سہولت کے ساتھ ادا کر سکیں۔

انہوں نے زور دیا کہ بابا گرونانک کے پیغام کو عالمی سطح پر اجاگر کیا جانا چاہیے تاکہ دنیا میں امن اور بھائی چارہ فروغ پائے۔

پاکستان سمیت دنیا بھر میں سکھ برادری آج عقیدت و احترام کے ساتھ اپنے بانی بابا گرونانک کا جنم دن منا رہی ہے۔