لاہور: مسلم لیگ (ن) کے قائد اور سابق وزیراعظم نواز شریف نے واضح الفاظ میں کہا ہے کہ پاکستان ہماری ریڈ لائن ہے، اور کسی کو بھی ملک کی سالمیت اور خودمختاری پر میلی آنکھ ڈالنے کی اجازت نہیں دی جائے گی۔
ایک اعلیٰ سطحی پارٹی اجلاس سے خطاب کرتے ہوئے نواز شریف نے کہا کہ پاکستان نے ہمیشہ امن اور استحکام کی پالیسی اپنائی ہے، تاہم اگر کسی نے جارحیت یا تخریب کاری کی کوشش کی تو قوم متحد ہو کر اس کا بھرپور جواب دے گی۔ ان کا کہنا تھا کہ “ہم نے ملک کو ایٹمی قوت بنایا تاکہ کوئی دشمن پاکستان کی طرف آنکھ اٹھا کر نہ دیکھ سکے، آج بھی ہمارا عزم وہی ہے۔”
نواز شریف نے حالیہ خطے کی کشیدہ صورتحال پر بھی بات کرتے ہوئے کہا کہ موجودہ حالات میں قومی اتحاد وقت کی اہم ضرورت ہے۔ انہوں نے اپوزیشن جماعتوں سے اپیل کی کہ وہ ملکی مفاد میں سیاسی اختلافات کو پسِ پشت ڈال کر یکجہتی کا مظاہرہ کریں۔
سابق وزیراعظم نے کہا کہ پاکستان کسی کی دشمنی نہیں چاہتا، لیکن اگر کسی نے ہمارے ملک کی سرحدوں، اداروں یا عوام کو نقصان پہنچانے کی کوشش کی تو اسے منہ توڑ جواب دیا جائے گا۔ انہوں نے قوم سے اپیل کی کہ وہ افواجِ پاکستان اور ریاستی اداروں کے ساتھ مکمل یکجہتی کا اظہار کریں۔
