عالمی جریدے دی ڈپلومیٹ کی تازہ رپورٹ میں کہا گیا ہے کہ پاکستان کی متحرک اور متوازن سفارت کاری کے باعث ملک ایک بار پھر خطے میں توجہ کا مرکز بن کر ابھرا ہے اور عالمی سطح پر اس کے مؤقف کو سنجیدگی سے سنا جا رہا ہے۔ رپورٹ کے مطابق چین نے پاکستان کے بڑھتے ہوئے علاقائی اور عالمی کردار کو بھرپور انداز میں سراہا ہے اور اس امر کو اجاگر کیا ہے کہ حکومت، ریاستی اداروں اور عوام کی جانب سے قومی معاملات پر یکساں اور دوٹوک مؤقف نے پاکستان کی ساکھ کو مضبوط کیا ہے۔ دی ڈپلومیٹ کے مطابق چین پاکستان کو ایک ایسا ملک سمجھتا ہے جو نہ صرف معاشی طور پر مضبوط ہونے کی صلاحیت رکھتا ہے بلکہ اپنی سرحدوں سے باہر بھی مؤثر سفارتی اور سیاسی کردار ادا کر سکتا ہے، جبکہ امریکا کے ساتھ بہتر تعلقات برقرار رکھتے ہوئے پاک چین دوستی بھی درست اور مثبت سمت میں آگے بڑھ رہی ہے۔ رپورٹ میں یہ بھی کہا گیا ہے کہ چین عالمی اور علاقائی معاملات میں پاکستان کے کردار کی حمایت جاری رکھے ہوئے ہے اور سلامتی کونسل اور شنگھائی تعاون تنظیم جیسے اہم فورمز پر پاکستان کو قیادت کے لیے ایک موزوں اور قابل اعتماد ملک تصور کرتا ہے، جبکہ پاکستان بھی متعدد شعبوں میں چین کے ساتھ اسٹرٹیجک شراکت داری کو اپنی خارجہ پالیسی کا اہم ستون سمجھتا ہے۔ دی ڈپلومیٹ کے مطابق چین نے ایک بار پھر پاکستان کی خودمختاری، آزادی اور علاقائی سالمیت کے تحفظ کے لیے اپنی غیر متزلزل حمایت کا اعادہ کیا ہے اور مسئلہ کشمیر کے حل کے لیے سلامتی کونسل کی قراردادوں کے مطابق پیش رفت پر زور دیا ہے، جبکہ افغان حکومت سے اعتدال پسندی اور ہمسایہ ممالک کے ساتھ بہتر تعلقات قائم کرنے کی ضرورت پر بھی زور دیا گیا ہے۔ ماہرین کا کہنا ہے کہ خطے اور عالمی سطح پر پاکستان کی موجودہ پالیسیوں کی کھلی حمایت اس بات کی واضح توثیق ہے کہ پاکستان کا سفارتی مؤقف مضبوط، مؤثر اور بین الاقوامی برادری کے لیے قابل قبول بنتا جا رہا ہے۔
حوالہ جاتی لنک: الجزیرہ کی پاکستان چین تعلقات پر حالیہ رپورٹ