ملتان: صوبہ پنجاب میں بڑھتی ہوئی اسموگ اور فضائی آلودگی کے باعث حکومتِ پنجاب نے تعلیمی اداروں کے اوقاتِ کار میں تبدیلی کا اعلان کر دیا ہے۔ محکمہ تعلیم کے مطابق یہ فیصلہ طلبہ کی صحت اور حفاظت کے پیش نظر کیا گیا ہے، تاکہ صبح کے وقت دھند اور آلودگی کے اثرات سے بچا جا سکے۔

نوٹیفکیشن کے مطابق ملتان سمیت جنوبی پنجاب کے تمام سرکاری و نجی اسکول اب صبح 9 بجے سے 2 بجے دوپہر تک کھلے رہیں گے، جبکہ جمعے کے دن اسکول 9 بجے سے 12 بجے تک چلیں گے۔ یہ نیا شیڈول عارضی طور پر نافذ کیا گیا ہے اور آلودگی کی شدت میں کمی کے بعد معمول کے اوقات بحال کر دیے جائیں گے۔

محکمہ تعلیم نے والدین سے اپیل کی ہے کہ وہ بچوں کو اسکول بھیجتے وقت ماسک پہنائیں اور کوشش کریں کہ طلبہ باہر کم سے کم وقت گزاریں۔ مزید برآں، انتظامیہ کو ہدایت کی گئی ہے کہ اسکولوں میں انڈور سرگرمیوں کو فروغ دیا جائے اور کھلی فضاء میں کھیلوں کے مقابلے فی الحال مؤخر کیے جائیں۔

ماحولیاتی اداروں کے مطابق ملتان کا ایئر کوالٹی انڈیکس (AQI) خطرناک حد تک بڑھ چکا ہے، جو 270 سے تجاوز کر گیا ہے۔ طبی ماہرین نے خبردار کیا ہے کہ ایسی فضا میں بچوں اور بزرگوں کو سانس لینے میں دشواری، آنکھوں میں جلن اور کھانسی جیسی علامات بڑھ سکتی ہیں۔