لاہور کے مصروف علاقے لکشمی چوک میں ہر سال شدید بارشوں کے دوران پانی جمع ہونے اور ٹریفک نظام متاثر ہونے کے مسئلے کے حل کے لیے اہم فیصلہ کر لیا گیا ہے۔ واسا نے بارشی پانی محفوظ کرنے کے لیے انڈر گراؤنڈ واٹر اسٹوریج ٹینک منصوبے پر عملی کام شروع کر دیا ہے۔
واسا حکام کے مطابق زیرِ زمین بنایا جانے والا یہ جدید واٹر ٹینک بارش کے دوران تیزی سے پانی جمع کرنے کی صلاحیت رکھے گا، جس سے نہ صرف سڑکوں پر پانی کھڑا ہونے کا مسئلہ حل ہوگا بلکہ زیرِ زمین پانی کے ذخائر میں اضافہ بھی ممکن ہوسکے گا۔ ٹینک میں موجود پانی بعد ازاں مختلف مقاصد کے لیے استعمال کیا جا سکے گا جس میں پارکوں کی آبپاشی، صفائی ستھرائی اور دیگر شہری سہولیات شامل ہیں۔
انجینئرنگ ٹیم کا کہنا ہے کہ منصوبہ مرحلہ وار مکمل ہوگا اور اس کے لیے جدید مشینری اور ٹیکنالوجی استعمال کی جا رہی ہے۔ اس منصوبے سے لکشمی چوک اور اردگرد کے علاقوں میں بارشی پانی کے بہاؤ اور نکاسی کے مسائل میں نمایاں بہتری آئے گی۔
شہریوں نے واسا کے اقدام کو سراہتے ہوئے کہا ہے کہ بارشوں کے موسم سے قبل اس منصوبے کی تکمیل ٹریفک پریشانیوں میں بڑی حد تک کمی کا باعث بنے گی۔
