بسنت کے تین دن لاہور میں دفعہ 144 نافذ، کم عمر بچوں کی پتنگ بازی پر پابندی
ڈپٹی کمشنر لاہور سید موسیٰ رضا نے وزیراعلیٰ پنجاب مریم نواز شریف کی منظوری کے بعد شہر لاہور میں بسنت کے تہوار کے لیے باضابطہ نوٹیفکیشن جاری کر دیا ہے جس کے تحت 6، 7 اور 8 فروری 2026 کو تین روزہ بسنت منانے کی اجازت دی گئی ہے۔ نوٹیفکیشن کے مطابق بسنت کے دوران خلاف ورزی کو روکنے اور شہریوں کی حفاظت کو یقینی بنانے کے لیے سخت ایس او پیز نافذ کیے گئے ہیں اور تمام پتنگ اور ڈور بنانے والے مینوفیکچررز کے لیے آن لائن رجسٹریشن لازمی قرار دی گئی ہے تاکہ غیر معیاری اور خطرناک مواد کی تیاری اور فروخت کو مکمل طور پر روکا جا سکے۔ خاص طور پر 18 سال سے کم عمر بچوں کے لیے پتنگ بازی کرنے پر مکمل پابندی عائد کی گئی ہے اور اگر کوئی نابالغ بچہ پتنگ بازی کرتے ہوئے پکڑا گیا تو اس کے والدین یا سرپرست کو قانونی طور پر ذمہ دار ٹھہرایا جائے گا اور ان کے خلاف سخت کارروائی کی جائے گی۔ ڈپٹی کمشنر نے خطرناک کیمیکل ڈور اور دھاتی چرخیاں فروخت کرنے پر مکمل پابندی عائد کر دی ہے اور واضح کیا ہے کہ ڈور صرف روایتی پنا کی شکل میں فروخت کی جا سکے گی۔
حکم نامے میں تفصیل سے بتایا گیا ہے کہ خونی یا دھاتی ڈور کی تیاری، فروخت اور استعمال پر زیرو ٹالرنس پالیسی اپنائی جائے گی اور کسی بھی قسم کی خلاف ورزی پر سخت قانونی کارروائی عمل میں لائی جائے گی۔ بغیر رجسٹریشن پتنگ یا ڈور تیار کرنے اور فروخت کرنے والوں کے خلاف فوری طور پر کیس درج کیا جائے گا اور انہیں سزا دی جائے گی۔ موٹرسائیکل سواروں کی حفاظت کو مدنظر رکھتے ہوئے ڈی سی لاہور نے ان کے لیے سیفٹی وائر یعنی حفاظتی تار کا استعمال لازمی قرار دیا ہے تاکہ پتنگوں کی ڈور سے گلے کٹنے اور جان لیوا حادثات کو روکا جا سکے۔ ٹریفک پولیس اور ضلعی انتظامیہ مشترکہ طور پر تمام پابندیوں اور ہدایات پر سختی سے عملدرآمد یقینی بنائیں گی اور خلاف ورزی کرنے والوں کے خلاف فوری کارروائی کی جائے گی۔ یہ فیصلہ 25 سال بعد لاہور میں بسنت کی واپسی کے طور پر دیکھا جا رہا ہے تاہم حکومت نے شہریوں کی جان و مال کی حفاظت کو اولین ترجیح دیتے ہوئے سخت احتیاطی تدابیر اختیار کی ہیں۔
حوالہ: ایکسپریس اردو
