خیبرپختونخوا کے وزیراعلیٰ محمد سہیل خان آفریدی نے صوبائی کابینہ کے اجلاس سے خطاب کرتے ہوئے واضح کیا ہے کہ صوبائی حکومت کسی بھی ملٹری آپریشن کی اجازت نہیں دے گی۔ان کا موقف ہے کہ “ملٹری آپریشن مسائل کا حل نہیں“۔ وزیراعلیٰ نے وضاحت کی کہ “ایک فرد یا ایک ادارہ زور زبردستی صوبے پر فیصلے مسلط نہیں کر سکتا“۔ انہوں نے خبردار کیا کہ “بند کمروں میں کیے گئے فیصلے” کے نتیجے وہ نہیں ہوں گے جو فیصلہ کرنے والے چاہتے ہیں، بلکہ اس سے تمام اسٹیک ہولڈرز میں تشویش پیدا ہوگی۔انہوں نے زور دے کر کہا کہ پائیدار اور مستقل امن کے لیے ایک جامع اور ہمہ گیر پالیسی ناگزیر ہے، جس میں تمام اداروں، سیاسی و مذہبی جماعتوں اور قبائلی مشران کو شامل کیا جائے۔ ان کے بقول، “تمام فریق مل کر بیٹھیں گے تو مؤثر پالیسی بنے گی اور امن بحال ہوگا“۔انہوں نے یہ بھی بتایا کہ خیبر پختونخوا اسمبلی میں تمام سیاسی و مذہبی جماعتوں کے نمائندوں پر مشتمل گرینڈ امن جرگہ منعقد کیا گیا تھا، جس نے متفقہ طور پر امن کے لیے ایک پندرہ نکاتی ایجنڈے کی منظوری دی تھی۔ اس ایجنڈے میں بھی واضح کیا گیا تھا کہ ملٹری آپریشن کوئی حل نہیں ہے۔رپورٹ میں یہ بھی بتایا گیا ہے کہ وزیراعلیٰ آفریدی کی قیادت میں پی ٹی آئی حکومت نے صوبے کے کالجز کی سولرائزیشن کا ایک جامع منصوبہ شروع کیا ہے۔ اب تک 213 کالجز سولر انرجی سے منسلک ہو چکے ہیں، جس میں گورنمنٹ فرنٹیئر کالج فار ویمن پشاور بھی شامل ہے، جو 5,000 سے زائد طالبات کو بلا تعطل بجلی فراہم کر رہا ہے۔

ماخذ: اردو پوائنٹ