تہران: ایران کے سپریم لیڈر آیت اللہ سید علی خامنہ ای نے کہا ہے کہ ایران امریکا کے ساتھ مذاکرات کے لیے تیار ہو سکتا ہے، تاہم اس کے لیے پہلے امریکا کو اپنے غلط رویے، ظالمانہ پابندیوں اور وعدہ خلافیوں کا ازالہ کرنا ہوگا۔
تہران میں طلبہ سے خطاب کرتے ہوئے آیت اللہ خامنہ ای نے واضح کیا کہ ایران کسی دباؤ کے تحت مذاکرات نہیں کرے گا۔ انہوں نے کہا کہ ماضی میں امریکا نے وعدے توڑے، معاہدوں سے منہ موڑا اور ایران کی معیشت کو نقصان پہنچانے کی کوشش کی، اس لیے اب اعتماد بحال ہونے تک کوئی براہ راست گفتگو ممکن نہیں۔
ان کا کہنا تھا کہ “ہم مذاکرات سے نہیں ڈرتے، مگر عزتِ نفس کے ساتھ بات چیت چاہتے ہیں۔ اگر امریکا اپنی پالیسیوں میں عملی تبدیلی لاتا ہے، تب ہی بات آگے بڑھ سکتی ہے۔”
خامنہ ای نے مزید کہا کہ امریکا نے ہمیشہ ایران کے داخلی معاملات میں مداخلت کی اور پابندیوں کو بطور ہتھیار استعمال کیا، جو کسی بھی آزاد ملک کے لیے ناقابلِ قبول ہے۔ انہوں نے ایرانی قوم سے اپیل کی کہ وہ اتحاد برقرار رکھے اور بیرونی دباؤ کے سامنے جھکنے سے گریز کرے۔
تجزیہ کاروں کے مطابق یہ بیان ایسے وقت میں سامنے آیا ہے جب خطے میں ایران، امریکا اور مغربی ممالک کے درمیان جوہری مذاکرات دوبارہ شروع ہونے کی افواہیں گردش کر رہی ہیں۔
