اسلام آباد: نائب وزیراعظم اور وزیرِ خزانہ اسحاق ڈار نے کہا ہے کہ 27ویں آئینی ترمیم پر حکومت کے پاس مطلوبہ نمبرز پورے ہیں، اور یہ ترمیم آئین اور جمہوریت کی مضبوطی کے لیے نہایت اہم قدم ہے۔

میڈیا سے گفتگو کرتے ہوئے اسحاق ڈار نے کہا کہ حکومت آئینی ترمیم کے حوالے سے تمام اتحادی جماعتوں سے رابطے میں ہے اور ان کی حمایت حاصل ہے۔ انہوں نے کہا کہ یہ ترمیم کسی جماعت یا فرد کے مفاد کے لیے نہیں بلکہ ملکی استحکام اور ادارہ جاتی ہم آہنگی کے لیے کی جا رہی ہے۔

ایک سوال کے جواب میں انہوں نے کہا کہ “نمبرز کی کمی کا کوئی مسئلہ نہیں، ہمیں ایوان میں واضح اکثریت حاصل ہے اور ترمیم منظور ہو جائے گی۔” اسحاق ڈار کا کہنا تھا کہ آئینی اصلاحات کے ذریعے عوامی نمائندوں کو مزید بااختیار بنایا جائے گا۔

انہوں نے اپوزیشن کو بھی دعوت دی کہ وہ اس عمل کا حصہ بنے تاکہ آئینی اور جمہوری تسلسل کو یقینی بنایا جا سکے۔ ڈار نے کہا کہ قومی اتفاقِ رائے ہی ملک کو سیاسی عدم استحکام سے نکالنے کا واحد راستہ ہے۔