پاکستان کرکٹ ٹیم کے سابق کپتان انضمام الحق پاکستان سپر لیگ کے 11ویں ایڈیشن میں اب راولپنڈی کی فرنچائز کے ساتھ منسلک ہو گئے ہیں۔ راولپنڈی کی ٹیم نے انضمام الحق کو اپنا پریزیڈنٹ کرکٹ افیئرز مقرر کیا ہے۔ اس سے قبل وہ پی ایس ایل کی دیگر فرنچائز پشاور زلمی کے صدر کے عہدے پر بھی خدمات انجام دے چکے ہیں۔ انضمام الحق کی راولپنڈی ٹیم میں شمولیت کو لیگ کی تیاریوں کے حوالے سے ایک اہم قدم قرار دیا جا رہا ہے۔
راولپنڈی کی ٹیم نے اس ایڈیشن کے لیے کھلاڑیوں کی خریداری میں بھی نمایاں سرمایہ کاری کی ہے۔ نسیم شاہ اس آکشن کے سب سے مہنگے کھلاڑی رہے جنہیں 8 کروڑ 65 لاکھ روپے میں ٹیم کا حصہ بنایا گیا۔ نیوزی لینڈ کے بیٹر ڈیرل مچل کو 8 کروڑ 5 لاکھ روپے میں خریدا گیا۔ فاسٹ بولر محمد عامر 5 کروڑ 40 لاکھ روپے میں راولپنڈی میں شامل ہوئے، جبکہ بنگلہ دیش کے لیگ اسپنر رشاد حسین کو 3 کروڑ روپے میں ٹیم میں لایا گیا۔ دیگر کھلاڑیوں میں لاری ایونز (ایک کروڑ 10 لاکھ)، عماد بٹ (80 لاکھ)، عبداللہ فضل (67 لاکھ 50 ہزار) اور کامران غلام (65 لاکھ) شامل ہیں۔
