کراچی میں ٹریفک قوانین کی نگرانی کے جدید نظام کے بعد ایک نیا مسئلہ شہریوں کے لیے پریشانی کا باعث بن گیا ہے۔ دیگر صوبوں میں رجسٹرڈ گاڑیوں کے ای چالان بھی کراچی کے شہریوں کے گلے پڑنے لگے ہیں، جس کے باعث شہری سخت ذہنی کوفت کا شکار ہیں۔
شہریوں کے مطابق جب کوئی بیرونِ صوبہ گاڑی کراچی میں داخل ہوتی ہے اور اس کا ای چالان سسٹم میں ظاہر ہوتا ہے تو غلطی سے وہ چالان کراچی کے مقامی شہریوں کے زیر ملکیت اسی طرح کی گاڑیوں کے نمبرز پر منتقل ہو جاتا ہے۔ کئی ایسے واقعات رپورٹ ہوئے ہیں جن میں شہریوں کو ہزاروں روپے کے بھاری ای چالان موصول ہوئے جبکہ وہ گاڑی کراچی سے کبھی باہر گئی ہی نہیں۔
محکمہ ایکسائز اور ٹریفک حکام نے اس صورتحال پر نوٹس لیتے ہوئے تحقیقات کا آغاز کر دیا ہے۔ حکام کے مطابق غلط چالان بنیادی طور پر نمبر پلیٹس کی ایک جیسی سیریز اور سافٹ ویئر میں ڈیٹا انٹری کی خامیوں کے باعث جاری ہو رہے ہیں۔ حکام نے شہریوں کو مشورہ دیا ہے کہ اگر کسی کو بیرونِ صوبہ غلط چالان موصول ہو تو فوری طور پر متعلقہ دفاتر سے رجوع کریں تاکہ معاملہ درست کیا جا سکے۔
کراچی کے شہریوں نے مطالبہ کیا ہے کہ چالان سسٹم کو فوری اپ ڈیٹ کیا جائے اور صوبوں کے درمیان ڈیٹا لنکنگ کا موثر نظام بنایا جائے تاکہ مستقبل میں یہ غلطیاں نہ ہوں۔
