غزہ: گلوبل صمود فلوٹیلا میں شامل ایک کشتی اسرائیلی بحری ناکہ بندی کو توڑتے ہوئے غزہ کی پٹی میں پہنچنے میں کامیاب ہوگئی۔ انسانی حقوق کی تنظیموں اور فلوٹیلا منتظمین کے مطابق اس کشتی میں ادویات، خوراک اور بنیادی ضروریات کی اشیاء شامل تھیں جو براہِ راست محصور فلسطینی عوام تک پہنچائی گئی ہیں۔
عینی شاہدین کے مطابق جیسے ہی کشتی غزہ کے ساحل پر پہنچی تو مقامی شہری بڑی تعداد میں جمع ہوگئے اور فلوٹیلا رضاکاروں کا استقبال کیا۔ فلسطینی حکام کا کہنا ہے کہ یہ اقدام عالمی برادری کے لیے ایک واضح پیغام ہے کہ غزہ کی ناکہ بندی غیر انسانی ہے اور انسانی حقوق کی خلاف ورزی کے مترادف ہے۔
دوسری جانب اسرائیلی حکام نے فلوٹیلا کے باقی جہازوں کو روکنے کی کوششیں تیز کر دی ہیں اور بحیرۂ روم میں نگرانی سخت کر دی گئی ہے۔ تاہم فلوٹیلا منتظمین نے عزم ظاہر کیا ہے کہ وہ ہر قیمت پر امداد غزہ تک پہنچائیں گے۔
