کراچی: ملک کے مختلف ہوائی اڈوں پر تکنیکی اور آپریشنل خرابیوں کے باعث پانچ پروازیں منسوخ کر دی گئیں جبکہ متعدد پروازیں تاخیر کا شکار ہوئیں۔ سول ایوی ایشن اتھارٹی (CAA) کے مطابق متاثرہ پروازوں میں کراچی، لاہور، اسلام آباد اور کوئٹہ جانے والی اندرون و بیرون ملک پروازیں شامل ہیں۔
ذرائع کے مطابق ایک نجی ایئرلائن کے دو جہازوں میں فنی خرابی کے باعث لاہور سے کراچی اور کراچی سے دبئی جانے والی پروازیں منسوخ کی گئیں۔ اسی طرح اسلام آباد سے جدہ اور کوئٹہ سے کراچی آنے والی پروازیں بھی آپریشنل مسائل کے باعث روانہ نہ ہو سکیں۔
ایئرپورٹ حکام کے مطابق تاخیر یا منسوخی سے متاثرہ مسافروں کو متبادل پروازوں میں ایڈجسٹ کرنے کے انتظامات کیے جا رہے ہیں۔ مسافروں کو ہدایت کی گئی ہے کہ وہ روانگی سے قبل اپنی پروازوں کی تازہ صورتحال کے لیے متعلقہ ایئرلائنز سے رابطہ کریں۔
سول ایوی ایشن نے کہا ہے کہ فنی ٹیمیں تمام متاثرہ جہازوں کی جانچ اور مرمت پر کام کر رہی ہیں تاکہ آئندہ پروازوں کا شیڈول بحال کیا جا سکے۔
