عمان: پاکستان کے فیلڈ مارشل اور آرمی چیف جنرل سید عاصم منیر نے اردن کے شاہ عبداللہ دوم سے عمان کے شاہی محل میں ملاقات کی، جس میں دونوں ممالک کے درمیان دفاعی تعاون، انسدادِ دہشت گردی کے اقدامات اور خطے کی سیکیورٹی سے متعلق امور پر تفصیلی تبادلہ خیال کیا گیا۔
آئی ایس پی آر کے مطابق ملاقات کے دوران فیلڈ مارشل عاصم منیر نے شاہ عبداللہ دوم کو پاکستانی مسلح افواج کی پیشہ ورانہ صلاحیتوں اور علاقائی امن و استحکام کے لیے کیے جانے والے اقدامات سے آگاہ کیا۔ شاہ عبداللہ دوم نے پاکستان کی افواج کے کردار کو سراہتے ہوئے کہا کہ دونوں ممالک کے درمیان تعلقات تاریخی، برادرانہ اور باہمی اعتماد پر مبنی ہیں۔
دونوں رہنماؤں نے اس موقع پر دفاعی شعبے میں تعاون کو مزید فروغ دینے، مشترکہ تربیتی پروگراموں، دفاعی ٹیکنالوجی کے تبادلے اور انسدادِ دہشت گردی کے تجربات سے باہمی استفادے پر اتفاق کیا۔
فیلڈ مارشل عاصم منیر نے شاہ عبداللہ دوم کو پاکستانی قوم اور قیادت کی جانب سے نیک خواہشات کا پیغام پہنچایا اور اردن کی سلامتی و ترقی کے لیے نیک تمناؤں کا اظہار کیا۔
ذرائع کے مطابق ملاقات میں مشرقِ وسطیٰ کی موجودہ صورتحال، فلسطین کے مسئلے، اور امتِ مسلمہ کے اتحاد سے متعلق امور بھی زیرِ بحث آئے۔ دونوں رہنماؤں نے عالمی امن کے قیام اور مسلم ممالک کے درمیان تعاون بڑھانے پر زور دیا۔
