اسرائیل کے جھوٹے حملے کی شدید مذمت، ایران کی خودمختاری پر واضح مؤقف

چیئرمین پاکستان پیپلز پارٹی اور سابق وزیر خارجہ بلاول بھٹو زرداری نے قومی اسمبلی میں خطاب کرتے ہوئے اسرائیل کی جانب سے ایران پر کیے گئے حملے کو جھوٹ پر مبنی قرار دیا۔ ان کا کہنا تھا کہ اسرائیل نے پہلے لبنان، پھر یمن اور اب ایران کو نشانہ بنایا ہے، اور اگر ہم نے اس وقت آواز نہ اٹھائی تو آئندہ ہمارے خلاف کوئی آواز بلند کرنے والا بھی نہ ہوگا۔

انہوں نے کہا کہ ایران پر الزامات لگائے گئے کہ وہ ایٹمی ہتھیار بنانے کے قریب ہے، لیکن یہ الزامات بے بنیاد اور کئی برسوں سے جاری جھوٹے بیانیے کا حصہ ہیں۔ بلاول بھٹو نے کہا کہ ایران کی جوہری تنصیبات پر حملہ عالمی قوانین کی کھلی خلاف ورزی ہے اور اس حملے سے پورے خطے کے عوام کی زندگیاں خطرے میں ڈال دی گئی ہیں۔

سلامتی کونسل میں امریکا کے حملے کی مذمت، اسرائیل خطے میں جنگ کا محرک

بلاول بھٹو نے کہا کہ ایران کی جوہری تنصیبات پر کیا جانے والا حملہ نہ صرف مہنگا ترین تھا بلکہ اس میں ایرانی قیادت اور صحافیوں کو بھی نشانہ بنایا گیا، جو انسانی حقوق کی سنگین خلاف ورزی ہے۔ انہوں نے واضح کیا کہ سلامتی کونسل میں بھی امریکا کے اس جارحانہ عمل کی مذمت کی گئی ہے۔

ان کا مزید کہنا تھا کہ اسرائیل، امریکی عوام کو جنگ میں جھونکنے کی کوشش کر رہا ہے، لیکن امریکی عوام اس جنگ کے حامی نہیں۔ بلاول نے زور دیا کہ ایران اور اسرائیل کے درمیان تنازع کا حل صرف تدبر اور تحمل سے ممکن ہے۔

سندھ طاس معاہدے سے متعلق گفتگو کرتے ہوئے بلاول بھٹو نے کہا کہ بھارت نے پہلگام دہشتگردی کے واقعے کے بعد معاہدہ ختم کرنے کی دھمکی دی، جو عالمی قوانین کی کھلی خلاف ورزی ہے۔ اگر بھارت پانی روکتا ہے تو پاکستان کو جنگ لڑنا پڑے گی۔ ان کا کہنا تھا کہ افواج پاکستان اور ایئر فورس اس ممکنہ چیلنج کا مقابلہ کرنے کے لیے مکمل طور پر تیار ہیں۔

انہوں نے کہا کہ بھارت کے پاس اب صرف دو راستے ہیں، یا تو سندھ طاس معاہدے کو تسلیم کرے یا اس کی خلاف ورزی کی صورت میں پاکستان اپنے عوام کو چھ کے چھ دریا فراہم کرے گا۔

بلاول بھٹو زرداری نے کہا کہ بھارت کی کوشش تھی کہ پاکستان کو دہشتگرد ریاست قرار دیا جائے، آئی ایم ایف پروگرام میں رکاوٹ ڈالی جائے، لیکن ہر محاذ پر بھارت کو شکست ہوئی۔ انہوں نے کہا کہ پاکستان کی وزارت خارجہ اور سفیروں نے اقوام متحدہ سمیت ہر بین الاقوامی فورم پر پاکستان کا مؤقف مؤثر انداز میں پیش کیا، اور ان کی کوششوں کو سلام پیش کرتا ہوں۔

نیتن یاہو کی “سستی کاپی” کو شکست دی

انہوں نے اپنے خطاب میں خطے کی سیاست پر طنزیہ انداز میں بات کرتے ہوئے کہا کہ ہمارے خطے میں بھی نیتن یاہو کی ایک سستی کاپی موجود ہے، جسے ہم نے جنگ، سفارتکاری اور بیانیے کے میدان میں شکست دی۔ انہوں نے کہا کہ ہم جہاں بھی گئے پاکستان کا بیانیہ پیش کیا اور دشمن کے نمائندے پیچھے پیچھے پہنچتے رہے، مگر اللہ نے ہمیں سفارتی اور عسکری سطح پر کامیابیاں عطا کیں۔

سابق وزیر خارجہ نے کہا کہ ماضی میں بھارت کشمیر کو اپنا اندرونی معاملہ کہتا تھا، لیکن آج یہ مسئلہ بین الاقوامی سطح پر اجاگر ہو چکا ہے۔ بلاول نے امید ظاہر کی کہ پاکستان اپنی جدوجہد جاری رکھے گا اور کشمیری عوام کو انصاف ضرور ملے گا۔

بلاول بھٹو زرداری کا قومی اسمبلی میں خطاب اس بات کی گواہی ہے کہ پاکستان نہ صرف اپنے مفادات کا دفاع کرنے کی صلاحیت رکھتا ہے بلکہ خطے میں امن و استحکام کا خواہاں بھی ہے۔ انہوں نے دنیا کو باور کرایا کہ اگر ایران یا پاکستان جیسے ممالک پر جارحیت مسلط کی گئی تو اس کا منہ توڑ جواب دیا جائے گا، اور پاکستان ہر فورم پر اپنے بیانیے کا دفاع کرے گا۔