بھارت میں جاری رانجی ٹرافی کے میچوں کے دوران کھلاڑیوں کو سخت فضائی آلودگی کے باعث ماسک پہن کر کھیلنے پر مجبور ہونا پڑا۔ ممبئی اور دہلی کے درمیان ہونے والے میچ میں، بالخصوص ممبئی کے باندرا کُرلا کمپلیکس میں، کھلاڑیوں نے آلودہ فضا سے بچنے کے لیے ماسک کا استعمال کیا۔ بھارتی میڈیا کے مطابق، اس آلودگی میں اضافہ گراؤنڈ کے قریب جاری تعمیراتی کاموں کی وجہ سے بھی ہوا ہے۔ ممبئی کے بیٹر سرفراز خان، مشیر خان اور ہمانشو سنگھ جیسے کھلاڑیوں نے ماسک لگا کر میچ میں شرکت کی۔ شہر کا ایئر کوالٹی انڈیکس 160 تک ریکارڈ کیا گیا جو کہ غیر تسلی بخش سطح ہے۔ یہ صورتحال اس وقت اور بھی اہم ہو جاتی ہے جب کہ ممبئی میں آنے والے ٹی ٹوئنٹی ورلڈ کپ کے کئی گروپ میچز اور سیمی فائنل بھی شیڈول ہیں۔ اس آلودگی نے ٹورنامنٹ سے پہلے ہی کھلاڑیوں کی صحت اور کارکردگی کے حوالے سے تشویش پیدا کر دی ہے۔