بنگلادیش کرکٹ بورڈ نے بھارت میں ہونے والے آئندہ ورلڈکپ کے لیے اپنی قومی کرکٹ ٹیم بھیجنے سے صاف انکار کر دیا ہے، ان کا کہنا ہے کہ وہ اپنے کھلاڑیوں کی سیکیورٹی اور ملکی وقار پر کوئی سمجھوتہ نہیں کر سکتے۔ ڈھاکا میں منعقدہ ایک پریس کانفرنس میں بورڈ کے صدر اور سپورٹس ایڈوائزر نے واضح الفاظ میں اعلان کیا کہ وہ ٹیم بھارت روانہ نہیں کریں گے البتہ اگر ٹورنامنٹ کا وینیو تبدیل ہو کر سری لنکا یا کوئی دوسرا ملک بن جائے تو وہ ٹیم بھیجنے پر غور کر سکتے ہیں۔ انہوں نے امید ظاہر کی کہ انٹرنیشنل کرکٹ کونسل (آئی سی سی) ان کے تحفظات پر غیر جانبدارانہ غور کرے گی۔ بورڈ کے عہدیداروں نے زور دے کر کہا کہ بنگلادیش نے اس عالمی مقابلے کے لیے کوالیفائی کیا ہے اور وہ اپنے وقار اور کھلاڑیوں کے تحفظ کو مدنظر رکھتے ہوئے بھارت کے علاوہ کسی اور مقام پر کھیلنا چاہتے ہیں۔ اس فیصلے نے کرکٹ دنیا میں ایک نئی بحث اور چیلنج کھڑا کر دیا ہے جس پر آئی سی سی اور متعلقہ حکام سے فوری توجہ کی توقع کی جا رہی ہے۔