وفاقی حکومت نے یوم یکجہتی کشمیر کے موقع پر ملک بھر میں عام تعطیل کا اعلان کردیا ہے اور کابینہ ڈویژن کی جانب سے باقاعدہ نوٹیفکیشن جاری کیا گیا ہے جس کے تحت پانچ فروری 2026 بروز بدھ کو تمام سرکاری دفاتر، مالیاتی ادارے، عدالتیں اور تعلیمی ادارے بند رہیں گے۔ نوٹیفکیشن میں کہا گیا ہے کہ کشمیری عوام سے اظہار یکجہتی کے لیے صبح دس بجے ایک منٹ کے لیے خاموشی اختیار کی جائے گی تاکہ مقبوضہ جموں و کشمیر میں بھارتی مظالم کے خلاف جدوجہد کرنے والے کشمیری بہن بھائیوں کے ساتھ اظہار یکجہتی کیا جاسکے۔ واضح رہے کہ پاکستان میں یوم یکجہتی کشمیر ہر سال پانچ فروری کو منایا جاتا ہے اور اس دن دنیا کو یہ پیغام پہنچانے کی کوشش کی جاتی ہے کہ جموں و کشمیر کے عوام جو اپنا حق خودارادیت مانگ رہے ہیں وہ ان کا بنیادی حق ہے جو اقوام متحدہ کے چارٹر میں بھی تسلیم کیا گیا ہے۔ حکومت نے ریاستی اداروں اور میڈیا کو ہدایت کی ہے کہ وہ مسئلہ کشمیر کو مؤثر انداز میں اجاگر کریں اور قومی و بین الاقوامی سطح پر آگاہی بڑھائیں تاکہ کشمیری عوام کی بھارتی تسلط و ظلم کے خلاف لازوال جدوجہد آزادی اور قربانیوں کا اعتراف کیا جاسکے۔ ٹیلی ویژن اور ریڈیو پر خصوصی پروگرام نشر کیے جائیں گے جن میں تنازع کے تاریخی پس منظر اور موجودہ صورتحال پر روشنی ڈالی جائے گی اور کشمیری عوام کی آواز کو دنیا بھر میں پہنچایا جائے گا۔ پانچ فروری کو کشمیری عوام سے اظہار یکجہتی کے لیے ملک بھر میں تقریبات اور ریلیاں منعقد کی جاتی ہیں اور یہ دن کشمیری عوام کی تحریک آزادی کی حمایت کے طور پر منایا جاتا ہے جس میں سرکاری و نجی سطح پر مختلف پروگراموں کا انعقاد ہوتا ہے۔ سندھ حکومت نے بھی یوم کشمیر کے موقع پر علیحدہ نوٹیفکیشن جاری کیا ہے جس کے تحت صوبے میں تمام سرکاری اور نجی ادارے بند رہیں گے۔ یومِ کشمیر کے پرامن انعقاد کو یقینی بنانے کے لیے بڑے شہروں میں سیکیورٹی انتظامات سخت کیے جانے کا امکان ہے اور قانون نافذ کرنے والے ادارے ریلیوں اور عوامی اجتماعات کے دوران الرٹ رہیں گے۔ وفاقی حکومت نے سال 2026 کے لیے تعطیلات کے شیڈول میں یوم کشمیر کو سال کی پہلی سرکاری تعطیل کے طور پر شامل کیا ہے اور اس کے بعد تیئیس مارچ کو یوم پاکستان کے موقع پر عام تعطیل ہوگی۔