لاہور ہائیکورٹ میں سانحہ بھاٹی گیٹ کیس کی سماعت کے دوران اہم پیشرفت ہوئی ہے۔ واقعے میں ماں اور بیٹی کے کھلے مین ہول میں گر کر جاں بحق ہونے سے متعلق وزیر اطلاعات پنجاب کے خلاف دائر کی گئی درخواست پر جسٹس سید شہباز رضوی نے سماعت کی۔ درخواست میں واقعے کی شفاف تحقیقات، غفلت کے مرتکب افسران کے خلاف کارروائی اور متاثرہ خاندان کو 25 کروڑ روپے معاوضہ دلانے کا مطالبہ کیا گیا ہے۔ درخواست گزار کے وکیل نے عدالت میں مؤقف پیش کرتے ہوئے کہا کہ انتہائی گنجان آباد علاقے میں مین ہول کو کھلا چھوڑنا سنگین غفلت ہے، جبکہ حکومت نے اصل ذمہ داروں کے خلاف کارروائی کرنے کے بجائے صرف نمائشی اقدامات کیے ہیں۔

عدالت نے اس معاملے کو مفاد عامہ سے متعلق قرار دیتے ہوئے تمام فریقین بشمول وفاقی حکومت کو نوٹس جاری کر دیے ہیں۔ جسٹس سید شہباز رضوی نے حکم دیا ہے کہ تمام فریق 3 مارچ 2026 تک اپنے جوابات عدالت میں جمع کروائیں۔ اس سماعت کے بعد اب کیس کی اگلی پیشرفت کا انحصار فریقین کے جمع کرائے گئے جوابات پر ہوگا۔