پاکستان کی حکومت نے آئی سی سی ٹی ٹوئنٹی ورلڈ کپ میں شرکت کے حوالے سے اہم فیصلہ کرتے ہوئے اعلان کیا ہے کہ قومی کرکٹ ٹیم ٹورنامنٹ میں تو شریک ہوگی لیکن 15 فروری 2026 کو بھارت کے خلاف شیڈول میچ کا بائیکاٹ کرے گی۔ وزیراعظم شہباز شریف اور چیئرمین پی سی بی محسن نقوی کی طویل مشاورت کے بعد جاری سرکاری بیان میں واضح کیا گیا ہے کہ بنگلہ دیش کے ساتھ یکجہتی کے اظہار کے طور پر یہ احتجاجی قدم اٹھایا جا رہا ہے۔ واضح رہے کہ بین الاقوامی کرکٹ کونسل (آئی سی سی) نے بنگلہ دیش کرکٹ بورڈ کے سیکیورٹی خدشات کو مسترد کرتے ہوئے ان کی ٹیم کو ٹورنامنٹ سے خارج کر دیا تھا اور ان کی جگہ سکاٹ لینڈ کو شامل کیا تھا۔ ذرائع کے مطابق پاکستانی ٹیم ٹورنامنٹ میں شرکت کے لیے پیر کے روز سری لنکا روانہ ہو گی۔ اس فیصلے کے بعد اب یہ دیکھنا ہوگا کہ آئی سی سی اس یکطوریہ میچ بائیکاٹ پر کیا ردعمل ظاہر کرتی ہے اور ٹورنامنٹ کے شیڈول اور پوائنٹس پر کیا اثرات مرتب ہوتے ہیں۔