لاہور: پنجاب حکومت نے شہریوں کے لیے گاڑیوں کی رجسٹریشن کا نیا اور آسان نظام متعارف کرا دیا ہے، جس کے تحت اب گاڑیوں کی رجسٹریشن کے لیے شہریوں کو طویل قطاروں یا دفاتر کے چکر نہیں لگانے پڑیں گے۔
محکمہ ایکسائز اینڈ ٹیکسیشن کے مطابق اب شہری آن لائن رجسٹریشن سسٹم کے ذریعے اپنی گاڑیاں گھر بیٹھے رجسٹر کروا سکتے ہیں۔ اس سہولت کے تحت رجسٹریشن فیس، ٹوکن ٹیکس اور نمبر پلیٹ کی فیس آن لائن جمع کروائی جا سکے گی، جبکہ رجسٹریشن سرٹیفکیٹ اور نمبر پلیٹ بذریعہ کورئیر صارف کے پتے پر پہنچائی جائے گی۔
نئے نظام کے آغاز سے عوام کو دفاتر میں طویل انتظار، بروکری نظام اور غیر ضروری کاغذی کارروائی سے نجات مل جائے گی۔ مزید برآں، اس نظام میں گاڑی کی تفصیلات، چیسس نمبر اور شناختی کارڈ کے ذریعے مکمل تصدیق بھی شامل ہے تاکہ فراڈ یا دوہری رجسٹریشن کے امکانات کو ختم کیا جا سکے۔
وزیراعلیٰ پنجاب مریم نواز نے اس اقدام کو ”عوام دوست اصلاحات“ قرار دیتے ہوئے کہا کہ جدید ٹیکنالوجی کے استعمال سے عوامی سہولت اولین ترجیح ہے۔ انہوں نے محکمہ ایکسائز کو ہدایت کی کہ شہریوں کو سہولت فراہم کرنے کے عمل میں کسی قسم کی تاخیر نہ ہو۔
محکمہ ایکسائز کا کہنا ہے کہ ابتدائی مرحلے میں یہ سہولت لاہور، فیصل آباد اور راولپنڈی میں فراہم کی گئی ہے، جسے جلد ہی صوبے کے تمام اضلاع تک بڑھایا جائے گا۔
