لاہور: پنجاب میں سموگ کی شدت میں کمی نہ آ سکی اور فضا بدستور آلودہ رہی۔ لاہور کا ایئر کوالٹی انڈیکس (AQI) 297 تک پہنچ گیا جو خطرناک سطح کے قریب ہے۔ شہریوں کو سانس لینے میں دشواری، آنکھوں میں جلن اور گلے کی خراش کی شکایات میں اضافہ دیکھا جا رہا ہے۔

محکمہ ماحولیات کے مطابق لاہور کے علاقوں گلبرگ، انارکلی، شادمان، اور ٹھوکر نیاز بیگ میں فضائی آلودگی کی شرح انتہائی بلند ریکارڈ کی گئی ہے۔ فیصل آباد، گوجرانوالہ، اور ملتان میں بھی فضا مضرِ صحت قرار دی گئی ہے، جہاں ایئر انڈیکس 250 سے تجاوز کر گیا۔

ماہرینِ صحت نے خبردار کیا ہے کہ سموگ میں موجود ذرات سانس کی بیماریوں، دمہ، اور دل کے امراض میں مبتلا افراد کیلئے خطرناک ثابت ہو سکتے ہیں۔ شہری غیر ضروری باہر نکلنے سے گریز کریں اور ماسک کا استعمال یقینی بنائیں۔

پنجاب حکومت نے سموگ سے نمٹنے کیلئے خصوصی ٹیمیں تشکیل دے دی ہیں۔ زرعی علاقوں میں فصلوں کی باقیات جلانے پر مکمل پابندی عائد کر دی گئی ہے جبکہ اینٹوں کے بھٹوں، فیکٹریوں اور دھوئیں خارج کرنے والی گاڑیوں کے خلاف کریک ڈاؤن جاری ہے۔

وزیراعلیٰ مریم نواز نے ضلعی انتظامیہ کو ہدایت کی ہے کہ آلودگی پر قابو پانے کیلئے تمام وسائل بروئے کار لائے جائیں اور عوامی آگاہی مہم مزید مؤثر بنائی جائے۔