لاہور: وزیراعلیٰ پنجاب مریم نواز شریف نے کہا ہے کہ عوام کی جان و مال کی حفاظت حکومت کی اولین ذمہ داری ہے، کسی کو انتشار پھیلانے یا امن و امان خراب کرنے کی ہرگز اجازت نہیں دی جائے گی۔
لاہور میں امن و امان کے حوالے سے اعلیٰ سطح اجلاس کی صدارت کرتے ہوئے مریم نواز نے کہا کہ صوبے میں قانون کی بالادستی یقینی بنائی جائے، ریاستی رٹ کو کسی صورت چیلنج نہیں ہونے دیا جائے گا۔ انہوں نے پولیس اور ضلعی انتظامیہ کو ہدایت دی کہ کسی بھی شرپسند سرگرمی یا غیر قانونی اجتماع کے خلاف فوری کارروائی کی جائے۔
وزیراعلیٰ نے مزید کہا کہ عوامی تحفظ اور امن کا قیام حکومت کی ترجیح ہے، کسی سیاسی یا ذاتی مفاد کے لیے صوبے کے امن کو خطرے میں نہیں ڈالا جا سکتا۔ انہوں نے کہا کہ عوام کو اشتعال دلانے اور افواہیں پھیلانے والوں کے خلاف سخت قانونی کارروائی ہوگی۔
مریم نواز نے کہا کہ حکومت پرامن احتجاج کے حق کو تسلیم کرتی ہے لیکن تشدد، توڑ پھوڑ اور نفرت انگیزی کو کسی صورت برداشت نہیں کیا جائے گا۔ انہوں نے افسران کو امن و امان کے حوالے سے روزانہ رپورٹ پیش کرنے کی ہدایت بھی دی۔
