لاہور: صوبائی دارالحکومت لاہور میں موسم نے کروٹ لینا شروع کر دی ہے، خنکی میں اضافہ اور سموگ کی شدت میں کمی ریکارڈ کی گئی ہے۔ محکمہ موسمیات کے مطابق شہر میں گزشتہ رات درجہ حرارت میں نمایاں کمی دیکھی گئی جس سے فضا میں خوشگوار ٹھنڈک کا احساس بڑھ گیا ہے۔

ماہرینِ موسمیات کا کہنا ہے کہ شمالی ہواؤں کے چلنے سے لاہور سمیت پنجاب کے بالائی علاقوں میں سموگ کی شدت میں وقتی کمی واقع ہوئی ہے، تاہم فضائی آلودگی کے خدشات اب بھی برقرار ہیں۔ شہریوں کو احتیاط برتنے اور ماسک کے استعمال کی ہدایت کی گئی ہے۔

محکمہ ماحولیات کے مطابق لاہور کا ایئر کوالٹی انڈیکس (AQI) اب بھی حساس سطح پر ہے، تاہم گزشتہ دنوں کے مقابلے میں بہتری آئی ہے۔ آئندہ چند روز میں مزید درجہ حرارت میں کمی اور صبح و رات کے وقت دھند میں اضافے کا امکان ہے۔

دوسری جانب محکمہ موسمیات نے خبردار کیا ہے کہ اگر بارش نہ ہوئی تو سموگ دوبارہ شدت اختیار کر سکتی ہے۔ شہریوں کو گاڑیوں کے دھوئیں اور کچرے کے جلاؤ سے گریز کی ہدایت کی گئی ہے تاکہ فضائی معیار کو بہتر رکھا جا سکے۔