اسلام آباد: بین الاقوامی ادارے “دی مسلم 500” کی سال 2025 کی رپورٹ کے مطابق معروف اسلامی اسکالر اور نائب صدر جامعہ دارالعلوم کراچی مفتی تقی عثمانی کو دنیا کی دوسری سب سے بااثر مسلم شخصیت قرار دیا گیا ہے۔

رپورٹ کے مطابق مفتی تقی عثمانی کا شمار نہ صرف پاکستان بلکہ پوری اسلامی دنیا کے ممتاز فقہا، محدثین اور شریعت اسکالرز میں ہوتا ہے۔ انہوں نے اسلامی بینکنگ، فقہِ اسلامی اور قضاء (اسلامی قانون) کے شعبے میں نمایاں خدمات انجام دی ہیں، جنہیں عالمی سطح پر تسلیم کیا گیا ہے۔

“دی مسلم 500” کی فہرست میں پہلی پوزیشن سعودی عرب کے شاہ سلمان بن عبدالعزیز نے حاصل کی، جبکہ تیسرے نمبر پر ترکی کے صدر رجب طیب اردوان رہے۔

رپورٹ میں کہا گیا ہے کہ مفتی تقی عثمانی نے اسلامی مالیاتی نظام کو عالمی سطح پر متعارف کرانے اور سود سے پاک بینکاری کے فروغ میں کلیدی کردار ادا کیا ہے۔ ان کی تصنیفات، فتاویٰ جات اور فقہی رہنمائی نے مسلم دنیا کے علمی حلقوں میں گہرا اثر چھوڑا ہے۔

واضح رہے کہ مفتی تقی عثمانی کو اس سے قبل بھی متعدد بین الاقوامی تنظیموں کی جانب سے اسلامی بینکنگ کے بانی شخصیات میں سے ایک کے طور پر سراہا جا چکا ہے۔