ریاض: سعودی عرب نے کھیلوں کی دنیا میں ایک اور تاریخی قدم اٹھاتے ہوئے دنیا کا پہلا ’اسکائی اسٹیڈیم‘ تعمیر کرنے کا اعلان کر دیا ہے۔ یہ اسٹیڈیم زمین سے بلندی پر تعمیر کیا جائے گا اور اپنی نوعیت کا پہلا جدید ترین فلوٹنگ اسٹیڈیم ہوگا۔
سعودی میڈیا کے مطابق یہ شاندار منصوبہ نیوم سٹی کے تحت تعمیر کیا جائے گا، جہاں جدید ٹیکنالوجی اور منفرد انجینئرنگ ڈیزائن استعمال کیے جائیں گے۔ ’اسکائی اسٹیڈیم‘ کو اس طرح ڈیزائن کیا جا رہا ہے کہ وہ فضا میں معلق نظر آئے گا، جبکہ اس میں جدید ترین سہولیات، اسمارٹ ٹیکنالوجی، اور ماحول دوست توانائی کے نظام شامل ہوں گے۔
رپورٹ کے مطابق یہ اسٹیڈیم کھیلوں کے عالمی مقابلوں کے لیے استعمال کیا جائے گا، اور اس کی گنجائش ہزاروں تماشائیوں پر مشتمل ہوگی۔ شائقین کے لیے جدید ترین لائیو ہولوگرام ڈسپلے، فلوٹنگ ویو پوائنٹس، اور خودکار نقل و حمل کا نظام بھی فراہم کیا جائے گا۔
سعودی عرب نے اس منصوبے کو اپنی ویژن 2030 کا حصہ قرار دیا ہے، جس کے تحت ملک میں جدید انفراسٹرکچر، سیاحت، اور اسپورٹس انڈسٹری کو فروغ دیا جا رہا ہے۔ حکام کا کہنا ہے کہ ’اسکائی اسٹیڈیم‘ مستقبل کی کھیلوں کی میزبانی کے تصور کو نئی جہت دے گا۔
دنیا بھر کے ماہرین نے سعودی عرب کے اس قدم کو “تعمیراتی اور ٹیکنالوجیکل انقلاب” قرار دیا ہے، جو کھیلوں کے میدان میں سعودی عرب کی قیادت کو مزید مضبوط کرے گا۔
