واشنگٹن: امریکی صدر ڈونلڈ ٹرمپ نے وینزویلا میں فینٹانیل کی بڑھتی ہوئی اسمگلنگ کے خلاف ممکنہ زمینی کارروائی کا عندیہ دے دیا ہے۔ ٹرمپ کا کہنا ہے کہ اگر وینزویلا کی حکومت منشیات کی ترسیل روکنے میں ناکام رہی تو امریکہ خود ایکشن لینے پر مجبور ہو جائے گا۔
امریکی صدر نے اپنے بیان میں کہا کہ فینٹانیل ایک خطرناک زہر ہے جو ہر سال ہزاروں امریکیوں کی جان لے رہا ہے، اور اس کے بیشتر ذخائر جنوبی امریکا سے اسمگل ہو کر امریکہ پہنچتے ہیں۔ ٹرمپ نے وینزویلا حکومت کو تنبیہ کی کہ اگر منشیات کے نیٹ ورک کے خلاف فوری کارروائی نہ کی گئی تو امریکہ اپنی سرزمین اور شہریوں کے تحفظ کے لیے فوجی طاقت استعمال کرنے سے دریغ نہیں کرے گا۔
ذرائع کے مطابق امریکی محکمہ دفاع نے بھی وینزویلا کے سرحدی علاقوں میں خفیہ نگرانی بڑھا دی ہے۔ امریکی خفیہ اداروں کی رپورٹس کے مطابق فینٹانیل کی بڑی مقدار کارٹیلز کے ذریعے وسطی امریکا کے راستے امریکہ منتقل کی جا رہی ہے۔
تجزیہ کاروں کے مطابق ٹرمپ کا یہ بیان امریکہ اور وینزویلا کے تعلقات میں مزید کشیدگی پیدا کر سکتا ہے، جو پہلے ہی سیاسی اختلافات اور پابندیوں کے باعث تناؤ کا شکار ہیں۔
