اسلام آباد (مانیٹرنگ ڈیسک): وزیراعظم شہباز شریف نے مسلم لیگ (ن) کے قائد نواز شریف سے اہم ملاقات کی، جس میں پاک افغان سرحدی صورتحال، سیکیورٹی چیلنجز اور دہشتگردی کے بڑھتے واقعات پر تفصیلی تبادلہ خیال کیا گیا۔ ذرائع کے مطابق ملاقات لاہور میں ہوئی جہاں دونوں رہنماؤں نے موجودہ علاقائی صورتحال بالخصوص افغانستان سے منسلک کشیدگی پر تشویش کا اظہار کیا۔
ذرائع کے مطابق نواز شریف نے وزیراعظم کو مشورہ دیا کہ پاکستان کو سفارتی محاذ پر متحرک کردار ادا کرتے ہوئے افغانستان کے ساتھ کشیدگی کم کرنے کے لیے اقدامات کرنے چاہییں۔ انہوں نے کہا کہ “ہمیں سخت مؤقف کے ساتھ ساتھ بات چیت کے دروازے بھی کھلے رکھنے چاہییں تاکہ دونوں ممالک کے عوام امن کے ثمرات حاصل کر سکیں۔”
وزیراعظم شہباز شریف نے نواز شریف کو حالیہ سیکیورٹی رپورٹس اور افغان حکومت کے ساتھ ہونے والے رابطوں سے آگاہ کیا۔ انہوں نے کہا کہ پاکستان کسی بھی قسم کی دہشتگردی برداشت نہیں کرے گا اور اپنی سرزمین کے تحفظ کے لیے ہر ممکن قدم اٹھائے گا۔
ملاقات میں سیاسی اور معاشی امور پر بھی گفتگو ہوئی جبکہ نواز شریف نے وزیراعظم کو اتحادی جماعتوں کے ساتھ مشاورت بڑھانے کا مشورہ دیا تاکہ قومی اتفاقِ رائے سے چیلنجز کا مقابلہ کیا جا سکے۔
دونوں رہنماؤں نے اس عزم کا اظہار کیا کہ پاکستان کی سلامتی، علاقائی امن اور استحکام کے لیے تمام تر کوششیں کی جائیں گی، جبکہ پاک افغان تعلقات کو باہمی احترام اور تعاون کی بنیاد پر آگے بڑھانے پر اتفاق کیا گیا۔
