اسلام آباد (مانیٹرنگ ڈیسک): حکومت پاکستان نے بے نظیر انکم سپورٹ پروگرام (BISP) کے مستفدین کو ڈیجیٹل والٹ سسٹم پر منتقل کرنے کا فیصلہ کر لیا ہے، جس کا مقصد ادائیگیوں کے نظام کو شفاف، تیز اور محفوظ بنانا ہے۔ یہ اقدام سماجی تحفظ کے نظام کو جدید تقاضوں سے ہم آہنگ کرنے کی جانب ایک اہم پیشرفت سمجھا جا رہا ہے۔
وفاقی وزیر برائے غربت مٹاؤ و سماجی تحفظ شازیہ مری کے مطابق اب مستحق خواتین کو امدادی رقم ڈیجیٹل والٹ کے ذریعے براہِ راست منتقل کی جائے گی، جس سے بینکوں کے طویل انتظار اور کرپشن کے امکانات ختم ہوں گے۔ اس کے علاوہ خواتین اپنے والٹ کے ذریعے رقوم کی بچت، بلوں کی ادائیگی اور آن لائن خریداری بھی کر سکیں گی۔
شازیہ مری نے کہا کہ ابتدائی مرحلے میں ملک کے چند اضلاع میں پائلٹ منصوبہ شروع کیا جا رہا ہے، جس کے بعد اسے پورے ملک میں وسعت دی جائے گی۔ انہوں نے مزید کہا کہ یہ اقدام بینظیر انکم سپورٹ پروگرام کو ڈیجیٹل معیشت سے جوڑنے اور خواتین کو مالی خودمختاری دینے کی سمت ایک عملی قدم ہے۔
معاشی ماہرین کے مطابق اس فیصلے سے نہ صرف شفافیت میں اضافہ ہوگا بلکہ پاکستان کے مالیاتی نظام میں ڈیجیٹل شمولیت کو فروغ ملے گا، جس سے لاکھوں خواتین کو جدید مالیاتی سہولیات تک براہِ راست رسائی حاصل ہوگی۔
