لاہور: پنجاب حکومت نے حالیہ بارشوں اور سیلاب سے متاثرہ علاقوں میں ایک بڑے پیمانے پر سروے مکمل کرلیا ہے جس میں 81 ہزار 510 متاثرہ افراد کا تفصیلی ڈیٹا جمع کیا گیا ہے۔ حکام کے مطابق یہ سروے صوبے کی تاریخ کا سب سے بڑا اور جامع سروے قرار دیا جا رہا ہے جس کا مقصد متاثرہ خاندانوں کی بحالی اور امدادی عمل کو شفاف اور مؤثر بنانا ہے۔
محکمہ بحالی و امداد (پی ڈی ایم اے) پنجاب کے مطابق یہ سروے جدید ٹیکنالوجی کی مدد سے کیا گیا جس میں متاثرہ خاندانوں کے مالی نقصانات، مکانات کو پہنچنے والے نقصان، فصلوں اور مال مویشیوں کے نقصان کے اعداد و شمار اکٹھے کیے گئے ہیں۔ اس سروے کے نتائج کی بنیاد پر حکومت متاثرین کے لئے مالی امداد اور بحالی کے منصوبے ترتیب دے گی۔
ترجمان پی ڈی ایم اے نے بتایا کہ امدادی رقم کی فراہمی براہ راست مستحقین کے بینک اکاؤنٹس میں کی جائے گی تاکہ شفافیت کو یقینی بنایا جا سکے۔ اس کے ساتھ ساتھ متاثرہ علاقوں میں بنیادی ڈھانچے کی بحالی، سڑکوں کی مرمت اور زرعی پیداوار کے لیے سہولتیں فراہم کرنے کا منصوبہ بھی بنایا جا رہا ہے۔
ماہرین کا کہنا ہے کہ اس سروے کے ذریعے حکومت کو مستقبل میں سیلاب جیسے قدرتی آفات سے نمٹنے کے لیے بہتر منصوبہ بندی میں مدد ملے گی اور متاثرین کو بروقت اور منصفانہ امداد فراہم کرنا ممکن ہوگا۔
