شاندار تیزی سے کاروباری ہفتے کا آغاز

پاکستان اسٹاک ایکسچینج (PSX) میں کاروباری ہفتے کے دوسرے روز کا آغاز شاندار تیزی سے ہوا۔ مارکیٹ کھلتے ہی سرمایہ کاروں کا بھرپور اعتماد نظر آیا، جس کے نتیجے میں بینچ مارک 100 انڈیکس میں 4300 پوائنٹس سے زائد کا غیر معمولی اضافہ ریکارڈ کیا گیا۔ اس تیزی کے بعد انڈیکس 1,20,500 پوائنٹس کی تاریخی سطح پر پہنچ گیا، جو ملکی اسٹاک مارکیٹ کے لیے ایک اہم سنگ میل ہے۔

یاد رہے کہ گزشتہ کاروباری روز مارکیٹ میں شدید مندی دیکھی گئی تھی۔ بین الاقوامی سطح پر امریکا کی جانب سے ایران پر حملے کے بعد خطے میں پیدا ہونے والی کشیدگی نے سرمایہ کاروں کو غیر یقینی صورتحال سے دوچار کر دیا تھا۔ نتیجتاً، سرمایہ کاروں نے گھبراہٹ میں بڑے پیمانے پر شیئرز فروخت کیے جس کے باعث 100 انڈیکس میں 3855 پوائنٹس کی کمی واقع ہوئی اور مارکیٹ 116,167 پوائنٹس پر بند ہوئی۔

اس مندی نے انڈیکس کو ایک ہی دن میں چار اہم نفسیاتی حدوں سے نیچے پہنچا دیا تھا، جس نے مارکیٹ کو دھچکا دیا اور معاشی تجزیہ کاروں کو گہری تشویش میں مبتلا کر دیا تھا۔

تاہم آج کی غیرمعمولی تیزی کو ماہرین سرمایہ کاروں کے اعتماد کی واپسی سے تعبیر کر رہے ہیں۔ ایران اور اسرائیل کے درمیان ممکنہ جنگ بندی کی خبروں نے عالمی اور مقامی سطح پر سرمایہ کاروں کے اعتماد کو بحال کیا ہے۔ مارکیٹ میں نہ صرف کاروباری سرگرمیوں میں تیزی آئی بلکہ سرمایہ کاری کی مجموعی مالیت میں بھی واضح اضافہ دیکھا گیا ہے۔

مارکیٹ کا تقابلی جائزہ